LATEST NEWS

Pahiuli aron Magbag-o

Eugene Elumir Jamandron | Pagmatuto

Padayun ang kontrobersiya labot sa giingon nga lista sa mga opisyal, mga naa sa posisyon ug ubang dagkong personalidad nga giingon nga nalambigit o dunay kalambigitan sa iligal nga droga og sa negosyo nini. Gani duna nay unang lista nga migula og gihinganlan na ni Presidente Rodrigo Duterte kinsa kining mga tawhana.

Giingon nga duna na usay laing lista nga ipagawas, apan hangtud karon wala pa mahibal-i kun tinuod ba kini o dili. Ang nakapait niini, ilabina ngadto sa mga ngalan nga nalakip sa lista kay mamansahan naman ang ilang pagkatawo o dungog bisan kun walay saktong ebidensya. Apan unsa man kaha ang basehanan sa paghimo sa maong lista? Subay sa giingon sa presidente nga duna siya’y credible o kasaligan nga tinubdan sa maong impormasyon nga maglambigit sa usa ka ngalan sa kontrobersiya. Sumala sa pinakaulahing lista adunay miingon nalakip nga mga ngalan sa mga opisyales sa Negros Oriental. Hinaut unta nga mahatagan kini og katin-awan sanglit makahatag ug makamugna kini og kahingawa sa mga lumolopyo sa probinsya.

Sa pipila pa lang ka bulan nga paglingkod sa mga napiling sulugoon sa mga lungsod, dakbayan bisan sa lalawigan, makita dayon ang kapasidad nila kun ugaling haum ba sila sa ilang gipanumpaan nga katungdanan. Sa Negros Oriental makita nga adunay mga kausaban ug mga paningkamot. Hinaut nga makita unta usab kini sa mga katawhan ilabi sa kauluhan aron mahimo kining sumbanan sa matinud-anon na paghatag ug serbisyo ngadto sa komunidad. Ang paglambo sa lungsod dili lamang mag-agad sa mga paningkamot sa mga sulugoon sa siyudad, lungsod o bisan sa probinsya kundili lakip ang tanan niini. Ang mga nagkalainlaing grupo ug mga hugpong kinahanglan nga magtambayayong aron mas gaan ug ligon ang mga paningkamot nga ipatuman kay alang man kini sa tanan. Sama lamang kini sa paghimo og mga buluhaton aron matabangan ang mga nagboluntaryo.

Ang usa ka tawo nga nasayop duna pay panahon nga mausab. Gani napatik man kini sa Balaang Kasulatan.

Apan unsa man ang angayan nga buhaton sa usa ka tawo nga nakasala? Dunay tulo ka mga butang nga iyang posibleng mahimo. Una, mangayo siya og pasaylo ngadto sa Labaw nga Makagagahum sa iyang mga kalapasan alang sa iyang espirituhanong kaluwasan. Ikaduha, mosugilon siya sa iyang mga sala ngadto sa kapolisan kay isip usa ka lungsuranon duna may mga balaud ug mga ordinansa nga nagagiya sa katawhan alang sa tul-id nga dalan aron maaninaw kun duna bay kalapasan nga nahimo. Ang ikatulo, mao ang pagpangayo ug pasaylo ngadto sa mga tawo nga imong nahimuan sa sala. Nindot nga hunahunaon kun mao kini ang mahitabo. Dunay kaseguruan ang kaluwasan sa usag-usa.

Sa panghitabo karon diin dunay daghan nga misurrender sa kapolisan labot sa ilang mga kalambigitan sa ilegal nga droga, positibo ang resulta niini. Kini kay duna may pag-angkon sa kasaypanan nga nahimo. Dugang niini, naa usab ang katuyuan nga magbag-o na sa ilang mga dautang gawi.

Dakung pagdayeg ang angayan nga itunol ngadto sa mga nagboluntaryo sanglit dili lalim nga moangkun ug kasalanan. Gani makaresulta man kini og mga pagsaway ug panghimaraut sa uban sanglit mailhan o mamarkahan man ang usa ka tawo nga ingon siya niana human miangkun sa iyang mga kasaypanan.

Ang gihimong mga outreach activities ug programa alang sa mga nisurrender haum kaayo ug usa ka pamaagi sa pagsuporta kanila. Hinaut nga magapadayon ang pagpahiuli nga programa o rehabilitation program nga gisugdan sa kagamhanan aron makasinati na og bag-ong paglaum ang mga nagboluntaryo. Apan labaw sa tanan, hinaut nga dunay rehabilitation center aron mahatagan og maayong pagtagad ang mga nagboluntaryo ug padayun ang ilang pagbag-o. Ang makanunayon nga programa alang sa pahiuli sa mga nagboluntaryo gikinahanglan aron makumpleto ug mamahimong mabolukon ang ilang mga sakprisyo sa ilang pagboluntaryo sa ilang mga kaugalingon aron magbag-o.

Leave a comment below

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: